ਨਵੀਂ ਦਿੱਲੀ: 
ਸ੍ਰੀਲੰਕਾ ਵਿੱਚ ਤਬਾਹੀ ਮਚਾਉਣ ਤੋਂ ਬਾਅਦ, ਤੂਫ਼ਾਨ ‘ਦਿਤਵਾਹ’ ਦਾ ਅਸਰ ਭਾਰਤ ਵਿੱਚ ਦਿਖਾਈ ਦੇਣ ਲੱਗਾ ਹੈ। ਦੱਖਣੀ ਭਾਰਤੀ ਰਾਜਾਂ ਵਿੱਚ ਮੌਸਮ ਬਦਲਣ ਲੱਗਾ ਹੈ। ਤੂਫ਼ਾਨ ‘ਦਿਤਵਾਹ’ ਦੇ ਮੱਦੇਨਜ਼ਰ, ਮੌਸਮ ਵਿਭਾਗ ਨੇ ਤਾਮਿਲਨਾਡੂ, ਆਂਧਰਾ ਪ੍ਰਦੇਸ਼ ਅਤੇ ਪੁਡੂਚੇਰੀ ਵਿੱਚ ਅਲਰਟ ਜਾਰੀ ਕਰ ਦਿੱਤਾ ਹੈ। ਅਧਿਕਾਰੀਆਂ ਨੇ ਲੋਕਾਂ ਨੂੰ ਸਮੁੰਦਰ ਦੇ ਨੇੜੇ ਜਾਣ ਤੋਂ ਬਚਣ ਦੀ ਅਪੀਲ ਕੀਤੀ ਹੈ।ਦਰਅਸਲ, ਦੱਖਣੀ ਭਾਰਤੀ ਰਾਜਾਂ ਤਾਮਿਲਨਾਡੂ, ਆਂਧਰਾ ਪ੍ਰਦੇਸ਼ ਅਤੇ ਪੁਡੂਚੇਰੀ ‘ਤੇ ‘ਦਿਤਵਾਹ’ ਤੂਫ਼ਾਨ ਦਾ ਖ਼ਤਰਾ ਮੰਡਰਾ ਰਿਹਾ ਹੈ। ਸਮੁੰਦਰ ਵੱਲ ਉੱਠੀਆਂ ਤੇਜ਼ ਹਵਾਵਾਂ ਅਤੇ ਲਗਾਤਾਰ ਹੋ ਰਹੀ ਬਾਰਿਸ਼ ਦੇ ਨਾਲ ਤੂਫ਼ਾਨ ‘ਦਿਤਵਾਹ’ ਪਹੁੰਚਣ ਵਾਲਾ ਹੈ। ਤਾਮਿਲਨਾਡੂ, ਆਂਧਰਾ ਪ੍ਰਦੇਸ਼ ਅਤੇ ਪੁਡੂਚੇਰੀ ਦੇ ਕਈ ਜ਼ਿਲ੍ਹਿਆਂ ਵਿੱਚ ਰੈੱਡ ਅਲਰਟ ਜਾਰੀ ਕੀਤਾ ਗਿਆ ਹੈ। ਬੰਗਾਲ ਦੀ ਖਾੜੀ ਵਿੱਚ ਆਏ ਚੱਕਰਵਾਤ ‘ਦਿਤਵਾਹ’ ਦੇ ਅਸਰ ਕਾਰਨ ਪੁਡੂਚੇਰੀ ਵਿੱਚ ਹਾਲਾਤ ਵਿਗੜਨ ਲੱਗੇ ਹਨ। ਪੁਡੂਚੇਰੀ ਦੇ ਤੱਟਵਰਤੀ ਇਲਾਕਿਆਂ ਵਿੱਚ ਚੱਕਰਵਾਤ ‘ਦਿਤਵਾਹ’ ਦਾ ਅਸਰ ਤੇਜ਼ੀ ਨਾਲ ਦੇਖਣ ਨੂੰ ਮਿਲ ਰਿਹਾ ਹੈ। ਭਾਰਤੀ ਮੌਸਮ ਵਿਭਾਗ ਨੇ ਚੱਕਰਵਾਤ ‘ਦਿਤਵਾਹ’ ਕਾਰਨ ਕੁਡਾਲੋਰ ਲਈ ਰੈੱਡ ਅਲਰਟ ਜਾਰੀ ਕੀਤਾ ਹੈ। ‘ਦਿਤਵਾਹ’ ਦੇ ਖ਼ਤਰੇ ਨੂੰ ਦੇਖਦਿਆਂ ਤਾਮਿਲਨਾਡੂ ਵਿੱਚ DRF ਅਤੇ SDRF ਦੀਆਂ 28 ਟੀਮਾਂ ਤਾਇਨਾਤ ਹਨ। ਤੱਟਵਰਤੀ ਇਲਾਕਿਆਂ ਵਿੱਚ ਬਚਾਅ ਦਲ ਪੂਰੀ ਤਰ੍ਹਾਂ ਤਿਆਰ ਹਨ। FWR ਅਤੇ CSSR ਸਾਜ਼ੋ-ਸਾਮਾਨ ਨਾਲ ਲੈਸ 6 BN NDRF ਦੀਆਂ 5 ਟੀਮਾਂ ਵਡੋਦਰਾ ਤੋਂ ਚੇਨਈ ਵਿੱਚ ਤਾਇਨਾਤ ਕੀਤੀਆਂ ਗਈਆਂ ਹਨ।
ਮੌਸਮ ਵਿਭਾਗ ਦਾ ਨਵੀਨਤਮ ਅਪਡੇਟ
ਭਾਰਤੀ ਮੌਸਮ ਵਿਭਾਗ (IMD) ਨੇ ਦੱਸਿਆ, “ਚੱਕਰਵਾਤੀ ਤੂਫ਼ਾਨ ‘ਦਿਤਵਾਹ’ ਬੰਗਾਲ ਦੀ ਖਾੜੀ ਦੇ ਦੱਖਣ-ਪੱਛਮੀ ਹਿੱਸੇ ਅਤੇ ਸ੍ਰੀਲੰਕਾ ਤੇ ਤਾਮਿਲਨਾਡੂ ਦੇ ਤੱਟਾਂ ਦੇ ਨੇੜੇ ਬਣਿਆ ਹੋਇਆ ਹੈ। ਬੀਤੇ 6 ਘੰਟਿਆਂ ਵਿੱਚ ਇਹ ਲਗਪਗ 5 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਉੱਤਰ ਦਿਸ਼ਾ ਵਿੱਚ ਵਧਿਆ ਅਤੇ 29 ਨਵੰਬਰ ਰਾਤ 11:30 ਵਜੇ ਇਹ ਦੱਖਣ-ਪੱਛਮੀ ਬੰਗਾਲ ਦੀ ਖਾੜੀ ਅਤੇ ਉੱਤਰੀ ਤਾਮਿਲਨਾਡੂ-ਪੁਡੂਚੇਰੀ ਤੱਟਾਂ ਦੇ ਨੇੜੇ ਕੇਂਦਰਿਤ ਸੀ। ਇਸਦਾ ਸਥਾਨ ਵੇਦਾਰਨੀਅਮ ਤੋਂ 90 ਕਿਲੋਮੀਟਰ ਪੂਰਬ-ਉੱਤਰਪੂਰਬ, ਕਰਾਇਕਲ ਤੋਂ 90 ਕਿਲੋਮੀਟਰ ਪੂਰਬ-ਦੱਖਣਪੂਰਬ, ਸ੍ਰੀਲੰਕਾ ਦੇ ਜਾਫਨਾ ਤੋਂ 130 ਕਿਲੋਮੀਟਰ ਉੱਤਰ-ਉੱਤਰਪੂਰਬ, ਪੁਡੂਚੇਰੀ ਤੋਂ 160 ਕਿਲੋਮੀਟਰ ਦੱਖਣ-ਦੱਖਣਪੂਰਬ ਅਤੇ ਚੇਨਈ ਤੋਂ 260 ਕਿਲੋਮੀਟਰ ਦੱਖਣ ਵਿੱਚ ਰਿਹਾ। ਮੌਸਮ ਵਿਭਾਗ ਅਨੁਸਾਰ ਇਹ ਤੂਫ਼ਾਨ ਅਗਲੇ 24 ਘੰਟਿਆਂ ਤੱਕ ਉੱਤਰੀ ਤਾਮਿਲਨਾਡੂ ਅਤੇ ਪੁਡੂਚੇਰੀ ਦੇ ਤੱਟਾਂ ਦੇ ਸਮਾਨਾਂਤਰ ਉੱਤਰ ਦਿਸ਼ਾ ਵਿੱਚ ਵਧੇਗਾ ਅਤੇ ਅੱਜ 30 ਨਵੰਬਰ ਦੀ ਸਵੇਰ ਅਤੇ ਸ਼ਾਮ ਤੱਕ ਤੱਟ ਤੋਂ 50 ਅਤੇ 25 ਕਿਲੋਮੀਟਰ ਦੀ ਦੂਰੀ ‘ਤੇ ਰਹੇਗਾ।”
ਫਲਾਈਟਾਂ ਰੱਦ
ਚੱਕਰਵਾਤੀ ਤੂਫ਼ਾਨ ‘ਦਿਤਵਾਹ’ ਕਾਰਨ ਯਾਤਰੀਆਂ ਨੂੰ ਅਸੁਵਿਧਾ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਚੇਨਈ ਹਵਾਈ ਅੱਡੇ ਨੇ 54 ਉਡਾਣਾਂ ਰੱਦ ਕਰ ਦਿੱਤੀਆਂ ਹਨ। ਚੱਕਰਵਾਤ ‘ਦਿਤਵਾਹ’ ਨੇ ਤਾਮਿਲਨਾਡੂ ਵਿੱਚ ਰੇਲ ਸੇਵਾਵਾਂ ਨੂੰ ਵੀ ਪ੍ਰਭਾਵਿਤ ਕੀਤਾ ਹੈ। ਤੂਫ਼ਾਨ ਦੇ ਖ਼ਤਰੇ ਨੂੰ ਦੇਖਦਿਆਂ ਸਦਰਨ ਰੇਲਵੇ ਨੇ ਆਪਣੀਆਂ ਟ੍ਰੇਨਾਂ ਦੇ ਸਮਾਂ-ਸਾਰਣੀ ਵਿੱਚ ਕੁਝ ਬਦਲਾਅ ਦਾ ਐਲਾਨ ਕੀਤਾ ਹੈ। ਯਾਤਰੀਆਂ ਦੀ ਸੁਰੱਖਿਆ ਨੂੰ ਦੇਖਦਿਆਂ ਰੇਲਵੇ ਨੇ ਵੀ ਵਾਰ ਰੂਮ ਸਰਗਰਮ ਕਰ ਦਿੱਤਾ ਹੈ, ਤਾਂ ਜੋ ਐਮਰਜੈਂਸੀ ਦੀ ਸਥਿਤੀ ਵਿੱਚ ਯਾਤਰੀਆਂ ਦੀ ਸੁਰੱਖਿਆ ਯਕੀਨੀ ਹੋਵੇ।
