ਨਵੀਂ ਦਿੱਲੀ।
ਦਿੱਲੀ ਦੇ ਪ੍ਰਦੂਸ਼ਣ ਨੂੰ ਲੈ ਕੇ ਲਗਾਤਾਰ ਚਿੰਤਾਜਨਕ ਅੰਕੜੇ ਸਾਹਮਣੇ ਆਉਂਦੇ ਰਹਿੰਦੇ ਹਨ। ਹੁਣ ਦੇਸ਼ ਦੀ ਸੰਸਦ ਵਿੱਚ ਇਸ ਨੂੰ ਲੈ ਕੇ ਕੇਂਦਰੀ ਸਿਹਤ ਮੰਤਰਾਲੇ ਨੇ ਵੀ ਅੰਕੜੇ ਪੇਸ਼ ਕੀਤੇ ਹਨ, ਜੋ ਇਹ ਦਰਸਾਉਂਦੇ ਹਨ ਕਿ ਪ੍ਰਦੂਸ਼ਣ ਅਤੇ ਸਾਹ ਦੀਆਂ ਬਿਮਾਰੀਆਂ ਦਾ ਆਪਸ ਵਿੱਚ ਕਿਸ ਤਰ੍ਹਾਂ ਸਬੰਧ ਹੈ।ਇੱਕ ਸਵਾਲ ਦੇ ਜਵਾਬ ਵਿੱਚ ਸਿਹਤ ਮੰਤਰੀ ਨੇ ਦੱਸਿਆ ਹੈ ਕਿ ਦਿੱਲੀ ਦੇ ਛੇ (6) ਪ੍ਰਮੁੱਖ ਕੇਂਦਰੀ ਸਰਕਾਰੀ ਹਸਪਤਾਲਾਂ ਦੇ ਐਮਰਜੈਂਸੀ ਵਿਭਾਗਾਂ ਵਿੱਚ 2022 ਅਤੇ 2024 ਦੇ ਵਿਚਕਾਰ ਤੀਬਰ ਸਾਹ ਦੀ ਬਿਮਾਰੀ (Acute Respiratory Illness – ARI) ਦੇ 2,04,758 ਮਾਮਲੇ ਦਰਜ ਕੀਤੇ ਗਏ। ਇਨ੍ਹਾਂ ਵਿੱਚੋਂ 15 ਪ੍ਰਤੀਸ਼ਤ ਮਰੀਜ਼ਾਂ, ਯਾਨੀ 30,420 ਮਰੀਜ਼ਾਂ, ਨੂੰ ਹਸਪਤਾਲ ਵਿੱਚ ਭਰਤੀ ਹੋਣ ਦੀ ਲੋੜ ਪਈ। ਰਾਜ ਸਭਾ ਵਿੱਚ ਨਾਮਜ਼ਦ ਸੰਸਦ ਮੈਂਬਰ ਡਾ. ਵਿਕਰਮਜੀਤ ਸਿੰਘ ਸਾਹਨੀ ਦੇ ਸਵਾਲ ‘ਤੇ ਇਹ ਡਾਟਾ ਕੇਂਦਰੀ ਸਿਹਤ ਤੇ ਪਰਿਵਾਰ ਭਲਾਈ ਮੰਤਰੀ ਪ੍ਰਤਾਪਰਾਓ ਜਾਧਵ ਨੇ ਸਦਨ ਵਿੱਚ ਪੇਸ਼ ਕੀਤਾ।
ਡਾ. ਸਾਹਨੀ ਨੇ ਪੁੱਛੇ ਇਹ ਸਵਾਲ
ਕੀ ਮੰਤਰਾਲੇ ਨੇ ਸ਼ਹਿਰੀ ਖੇਤਰਾਂ ਵਿੱਚ ਵਧ ਰਹੇ ਪ੍ਰਦੂਸ਼ਣ ਅਤੇ ਸਾਹ ਦੀਆਂ ਬਿਮਾਰੀਆਂ ਵਿਚਕਾਰ ਸਬੰਧ ਦਾ ਅਧਿਐਨ ਕੀਤਾ ਹੈ? ਮੈਟਰੋ ਸ਼ਹਿਰਾਂ, ਖਾਸ ਤੌਰ ‘ਤੇ ਦਿੱਲੀ ਵਿੱਚ 2022 ਤੋਂ 2025 ਦੇ ਵਿਚਕਾਰ ਦਮਾ (Asthma), ਸੀਓਪੀਡੀ (COPD) ਅਤੇ ਫੇਫੜਿਆਂ ਦੇ ਇਨਫੈਕਸ਼ਨ (Lung Infection) ਦੇ ਕਿੰਨੇ ਮਰੀਜ਼ ਵਧੇ ਤੇ ਕਿੰਨੇ ਭਰਤੀ ਹੋਏ, ਇਸ ਦਾ ਅੰਕੜਾ ਕੀ ਹੈ? ਕੀ ਮੰਤਰਾਲੇ ਦੀ ਅਜਿਹੀ ਕੋਈ ਨੀਤੀ ਨਿਰਮਾਣ ਦੀ ਯੋਜਨਾ ਹੈ, ਜਿਸ ਵਿੱਚ ਹਵਾ ਪ੍ਰਦੂਸ਼ਣ ਅਤੇ ਸਾਹ ਨਾਲ ਸਬੰਧਤ ਬਿਮਾਰੀਆਂ ਦਾ ਕੀ ਕਨੈਕਸ਼ਨ ਹੈ, ਇਹ ਸਮਝਿਆ ਜਾ ਸਕੇ?
