ਨਵੀਂ ਦਿੱਲੀ: 
ਸਰੀਰ ਵਿੱਚ ਯੂਰਿਕ ਐਸਿਡ ਦਾ ਵਧਣਾ ਅੱਜਕੱਲ੍ਹ ਇੱਕ ਆਮ ਸਿਹਤ ਸਮੱਸਿਆ ਬਣ ਗਈ ਹੈ। ਯੂਰਿਕ ਐਸਿਡ ਵਧਣ ਕਾਰਨ ਜੋੜਾਂ ਵਿੱਚ ਦਰਦ, ਸੋਜ, ਕਿਡਨੀ ਸਟੋਨ (ਪੱਥਰੀ) ਅਤੇ ਗਾਊਟ ਦੀ ਸਮੱਸਿਆ ਹੋ ਸਕਦੀ ਹੈ। ਇਸ ਲਈ ਇਸ ਨੂੰ ਕੰਟਰੋਲ ਕਰਨਾ ਬਹੁਤ ਜ਼ਰੂਰੀ ਹੈ।ਆਮ ਤੌਰ ‘ਤੇ ਕਿਡਨੀ ਯੂਰਿਕ ਐਸਿਡ ਨੂੰ ਫਿਲਟਰ ਕਰਕੇ ਬਾਹਰ ਕੱਢ ਦਿੰਦੀ ਹੈ। ਪਰ ਜੇਕਰ ਖਾਣੇ ਵਿੱਚ ਪਿਊਰੀਨ (Purine) ਦੀ ਮਾਤਰਾ ਵਧ ਜਾਵੇ, ਤਾਂ ਸਰੀਰ ਜ਼ਿਆਦਾ ਯੂਰਿਕ ਐਸਿਡ ਬਣਾਉਣ ਲੱਗਦਾ ਹੈ, ਜਿਸ ਕਾਰਨ ਸਰੀਰ ਵਿੱਚ ਕਈ ਤਰ੍ਹਾਂ ਦੀਆਂ ਸਮੱਸਿਆਵਾਂ ਹੋ ਸਕਦੀਆਂ ਹਨ। ਪਰ ਘਬਰਾਉਣ ਦੀ ਲੋੜ ਨਹੀਂ ਹੈ। ਕੁਝ ਖਾਸ ਚੀਜ਼ਾਂ ਨੂੰ ਆਪਣੀ ਡਾਈਟ ਵਿੱਚੋਂ ਬਾਹਰ ਕੱਢ ਕੇ ਤੁਸੀਂ ਯੂਰਿਕ ਐਸਿਡ ਨੂੰ ਆਸਾਨੀ ਨਾਲ ਕੰਟਰੋਲ ਕਰ ਸਕਦੇ ਹੋ। ਆਓ ਜਾਣੀਏ ਹਾਈ ਯੂਰਿਕ ਐਸਿਡ ਵਿੱਚ ਕਿਨ੍ਹਾਂ ਚੀਜ਼ਾਂ ਤੋਂ ਪਰਹੇਜ਼ ਕਰਨਾ ਚਾਹੀਦਾ ਹੈ।
1. ਰੈੱਡ ਮੀਟ ਅਤੇ ਆਰਗਨ ਮੀਟ= ਯੂਰਿਕ ਐਸਿਡ ਦੇ ਮਰੀਜ਼ਾਂ ਲਈ ਮਾਸਾਹਾਰੀ ਭੋਜਨ, ਖਾਸ ਕਰਕੇ ਰੈੱਡ ਮੀਟ (ਜਿਵੇਂ ਮਟਨ) ਅਤੇ ਆਰਗਨ ਮੀਟ (ਜਿਵੇਂ ਲਿਵਰ, ਕਿਡਨੀ), ਸਭ ਤੋਂ ਵੱਧ ਨੁਕਸਾਨਦੇਹ ਹੁੰਦੇ ਹਨ। ਇਨ੍ਹਾਂ ਵਿੱਚ ਪਿਊਰੀਨ ਦੀ ਮਾਤਰਾ ਬਹੁਤ ਜ਼ਿਆਦਾ ਹੁੰਦੀ ਹੈ। ਜਦੋਂ ਸਰੀਰ ਇਨ੍ਹਾਂ ਨੂੰ ਪਚਾਉਂਦਾ ਹੈ, ਤਾਂ ਯੂਰਿਕ ਐਸਿਡ ਦਾ ਪੱਧਰ ਅਚਾਨਕ ਵਧ ਜਾਂਦਾ ਹੈ।
2. ਮਿੱਠੇ ਡਰਿੰਕਸ ਅਤੇ ਫਰੂਕਟੋਜ਼- ਬਾਜ਼ਾਰ ਵਿੱਚ ਮਿਲਣ ਵਾਲੇ ਕੋਲਡ ਡਰਿੰਕਸ, ਪੈਕ ਕੀਤੇ ਜੂਸ ਅਤੇ ਸੋਡਾ ਯੂਰਿਕ ਐਸਿਡ ਦੇ ਵੱਡੇ ਦੁਸ਼ਮਣ ਹਨ। ਇਨ੍ਹਾਂ ਡਰਿੰਕਸ ਵਿੱਚ ਫਰੂਕਟੋਜ਼ ਹੁੰਦਾ ਹੈ, ਜੋ ਸਰੀਰ ਵਿੱਚ ਯੂਰਿਕ ਐਸਿਡ ਦੇ ਉਤਪਾਦਨ ਨੂੰ ਤੇਜ਼ ਕਰਦਾ ਹੈ ਅਤੇ ਕਿਡਨੀ ਰਾਹੀਂ ਇਸ ਨੂੰ ਬਾਹਰ ਕੱਢਣ ਦੀ ਪ੍ਰਕਿਰਿਆ ਨੂੰ ਹੌਲੀ ਕਰ ਦਿੰਦਾ ਹੈ।
3. ਸ਼ਰਾਬ= ਸ਼ਰਾਬ ਦਾ ਸੇਵਨ ਯੂਰਿਕ ਐਸਿਡ ਦੀ ਸਮੱਸਿਆ ਨੂੰ ਕਈ ਗੁਣਾ ਵਧਾ ਦਿੰਦਾ ਹੈ। ਇਸ ਵਿੱਚ ਵੀ ਬੀਅਰ ਸਭ ਤੋਂ ਵੱਧ ਖ਼ਤਰਨਾਕ ਮੰਨੀ ਜਾਂਦੀ ਹੈ ਕਿਉਂਕਿ ਇਸ ਵਿੱਚ ਪਿਊਰੀਨ ਅਤੇ ਖਮੀਰ (Yeast) ਦੀ ਮਾਤਰਾ ਜ਼ਿਆਦਾ ਹੁੰਦੀ ਹੈ। ਇਸ ਤੋਂ ਇਲਾਵਾ, ਸ਼ਰਾਬ ਸਰੀਰ ਨੂੰ ਡੀਹਾਈਡ੍ਰੇਟ ਕਰਦੀ ਹੈ, ਜਿਸ ਨਾਲ ਕਿਡਨੀ ਯੂਰਿਕ ਐਸਿਡ ਨੂੰ ਬਾਹਰ ਕੱਢਣ ਵਿੱਚ ਅਸਮਰੱਥ ਹੋ ਜਾਂਦੀ ਹੈ।
4. ਕੁਝ ਖਾਸ ਕਿਸਮ ਦੇ ਸੀ-ਫੂਡ = ਹਾਲਾਂਕਿ ਮੱਛੀ ਸਿਹਤ ਲਈ ਚੰਗੀ ਮੰਨੀ ਜਾਂਦੀ ਹੈ, ਪਰ ਯੂਰਿਕ ਐਸਿਡ ਵਧਣ ‘ਤੇ ਕੁਝ ਖਾਸ ਮੱਛੀਆਂ ਜਿਵੇਂ ਕਿ ਮੈਕਰੇਲ, ਸਾਰਡਿਨ ਅਤੇ ਝੀਂਗਾ (Shrimp) ਤੋਂ ਬਚਣਾ ਚਾਹੀਦਾ ਹੈ। ਇਨ੍ਹਾਂ ਵਿੱਚ ਪਿਊਰੀਨ ਦਾ ਪੱਧਰ ਜ਼ਿਆਦਾ ਹੁੰਦਾ ਹੈ ਜੋ ਜੋੜਾਂ ਦੇ ਦਰਦ ਨੂੰ ਵਧਾ ਸਕਦਾ ਹੈ।
5. ਦਾਲਾਂ ਅਤੇ ਕੁਝ ਸਬਜ਼ੀਆਂ=ਸ਼ਾਕਾਹਾਰੀ ਖਾਣੇ ਵਿੱਚ ਵੀ ਕੁਝ ਅਜਿਹੀਆਂ ਚੀਜ਼ਾਂ ਹਨ ਜੋ ਯੂਰਿਕ ਐਸਿਡ ਵਧਾ ਸਕਦੀਆਂ ਹਨ। ਇਨ੍ਹਾਂ ਵਿੱਚ ਸਾਬਤ ਦਾਲਾਂ ਜਿਵੇਂ—ਰਾਜਮਾ, ਛੋਲੇ, ਉੜਦ ਅਤੇ ਸਬਜ਼ੀਆਂ ਵਿੱਚ ਫੁੱਲਗੋਭੀ, ਪਾਲਕ ਅਤੇ ਮਸ਼ਰੂਮ ਸ਼ਾਮਲ ਹਨ। ਇਨ੍ਹਾਂ ਵਿੱਚ ਪਿਊਰੀਨ ਦੀ ਮਾਤਰਾ ਦਰਮਿਆਨੀ ਹੁੰਦੀ ਹੈ, ਪਰ ਯੂਰਿਕ ਐਸਿਡ ਵਧਿਆ ਹੋਣ ‘ਤੇ ਇਨ੍ਹਾਂ ਦਾ ਸੇਵਨ ਸੀਮਤ ਕਰਨਾ ਚਾਹੀਦਾ ਹੈ।
