ਤਿਰੂਵਲੂਰ :
ਤਾਮਿਲਨਾਡੂ ਦੇ ਤਿਰੂਵਲੂਰ ਜ਼ਿਲ੍ਹੇ ਵਿਚ ਇਕ ਮੰਦਭਾਗੇ ਹਾਦਸੇ ਕਾਰਨ 9 ਮਜ਼ਦੂਰਾਂ ਦੀ ਮੌਤ ਹੋ ਗਈ। ਐਨਨੋਰ ਥਰਮਲ ਪਾਵਰ ਪਲਾਂਟ ਵਿਚ ਨਿਰਮਾਣ ਕਾਰਜ ਦੌਰਾਨ ਸਟੀਲ ਦੀ ਕਮਾਨ ਡਿੱਗਣ ਨਾਲ ਉੱਤਰੀ ਸੂਬਿਆਂ ਦੇ ਨੌਂ ਪ੍ਰਵਾਸੀ ਮਜ਼ਦੂਰਾਂ ਦੀ ਮੌਤ ਹੋ ਗਈ। ਰੀਪੋਰਟਾਂ ਮੁਤਾਬਕ ਚਾਰ ਮਜ਼ਦੂਰਾਂ ਦੀ ਮੌਕੇ ਉਤੇ ਹੀ ਮੌਤ ਹੋ ਗਈ। ਸਟੈਨਲੇ ਦੇ ਸਰਕਾਰੀ ਹਸਪਤਾਲ ਲਿਜਾਣ ਤੋਂ ਬਾਅਦ ਪੰਜ ਹੋਰ ਲੋਕਾਂ ਦੀ ਮੌਤ ਹੋ ਗਈ। ਕਈ ਹੋਰ ਜ਼ਖ਼ਮੀਆਂ ਦਾ ਇਲਾਜ ਚੱਲ ਰਿਹਾ ਹੈ।ਪੀੜਤ ਚੱਲ ਰਹੇ ਨਿਰਮਾਣ ਵਿਚ ਰੁੱਝੇ ਹੋਏ ਸਨ ਜਦੋਂ ਸਟੀਲ ਦੀ ਕਮਾਨ ਅਚਾਨਕ ਡਿੱਗ ਗਈ, ਜਿਸ ਨਾਲ ਉਹ ਹੇਠਾਂ ਦੱਬੇ ਗਏ। ਐਮਰਜੈਂਸੀ ਸੇਵਾਵਾਂ ਅਤੇ ਬਚਾਅ ਟੀਮਾਂ ਨੂੰ ਤੁਰਤ ਘਟਨਾ ਵਾਲੀ ਥਾਂ ਉਤੇ ਤਾਇਨਾਤ ਕਰ ਦਿਤਾ ਗਿਆ। ਰੀਪੋਰਟਾਂ ਮੁਤਾਬਕ ਤਾਮਿਲਨਾਡੂ ਬਿਜਲੀ ਬੋਰਡ ਦੇ ਸਕੱਤਰ ਜੇ. ਰਾਧਾਕ੍ਰਿਸ਼ਨਨ ਅਤੇ ਟੈਂਗੇਡਕੋ ਦੇ ਚੇਅਰਮੈਨ ਜ਼ਖਮੀਆਂ ਨੂੰ ਮਿਲਣ ਲਈ ਸਟੈਨਲੇ ਹਸਪਤਾਲ ਗਏ। ਅਵਾਦੀ ਪੁਲਿਸ ਕਮਿਸ਼ਨਰੇਟ ਨੇ ਕਿਹਾ ਕਿ ਬਚਾਅ ਕਾਰਜ ਜਾਰੀ ਹਨ ਅਤੇ ਅਧਿਕਾਰੀਆਂ ਨੇ ਘਟਨਾ ਦੀ ਜਾਂਚ ਸ਼ੁਰੂ ਕਰ ਦਿਤੀ ਹੈ। ਢਹਿ ਜਾਣ ਦੇ ਸਹੀ ਕਾਰਨਾਂ ਦਾ ਅਜੇ ਪਤਾ ਨਹੀਂ ਲੱਗ ਸਕਿਆ ਹੈ।
