ਇੰਫਾਲ, 
ਮਨੀਪੁਰ ਦੇ ਚੂੜਚੰਦਪੁਰ ਜ਼ਿਲ੍ਹੇ ਦੇ ਤਹਿਤ ਹੈਂਗਲੇਪ ਸਬ ਡਵੀਜ਼ਨ ਦੇ ਖਾਨਪੀ ਪਿੰਡ ਮੰਗਲਵਾਰ ਨੂੰ ਸੁਰੱਖਿਆ ਦਸਤਿਆਂ ਨਾਲ ਮੁਕਾਬਲੇ ’ਚ ਪਾਬੰਦੀਸ਼ੁਦਾ ਸੰਗਠਨ ਯੂਨਾਈਟਿਡ ਕੁਕੀ ਨੈਸ਼ਨਲ ਆਰਮੀ (ਯੂਕੇਐੱਨਏ) ਦੇ ਘੱਟੋ ਘੱਟ ਚਾਰ ਅੱਤਵਾਦੀ ਮਾਰੇ ਗਏ। ਇਹ ਹੱਤਿਆ, ਲੋਕਾਂ ਨੂੰ ਧਮਕਾਉਣ ਤੇ ਜਬਰੀ ਵਸੂਲੀ ਵਰਗੇ ਅਪਰਾਧਾਂ ’ਚ ਸ਼ਾਮਲ ਸਨ। ਸੁਰੱਖਿਆ ਅਧਿਕਾਰੀਆਂ ਦੇ ਮੁਤਾਬਕ, ਚਾਰ ਨਵੰਬਰ ਦੀ ਤੜਕੇ ਇਕ ਖੁਫੀਆ ਸੂਚਨਾ ’ਤੇ ਆਧਾਰਤ ਅਭਿਆਨ ਦੌਰਾਨ ਅੱਤਵਾਦੀਆਂ ਨੇ ਚੂੜਚੰਦਪੁਰ ਤੋਂ ਲਗਪਗ 80 ਕਿਲੋਮੀਟਰ ਪੱਛਮੀ ਖਾਨਪੀ ਪਿੰਡ ’ਚ ਫ਼ੌਜ ਦੀ ਟੁੱਕੜੀ ’ਤੇ ਬਿਨਾ ਉਕਸਾਵੇ ਦੇ ਗੋਲੀਬਾਰੀ ਕੀਤੀ। ਸੁਰੱਖਿਆ ਦਸਤਿਆਂ ਤੇ ਯੂਕੇਐੱਨਏ ਦੇ ਆਰਮਡ ਅੱਤਵਾਦੀਆਂ ਵਿਚਾਲੇ ਹੋਈ ਗੋਲੀਬਾਰੀ ’ਚ ਚਾਰ ਅੱਤਵਾਦੀਆਂ ਨੂੰ ਢੇਰ ਕਰ ਦਿੱਤਾ ਗਿਆ। ਇਹ ਅਭਿਆਨ ਹਾਲੀਆ ਯੂਕੇਐੱਨਏ ਦੇ ਅੱਤਵਾਦੀਆਂ ਵਲੋਂ ਕੀਤੇ ਗਏ ਅੱਤਿਆਚਾਰਾਂ ਦੇ ਬਾਅਦ ਕੀਤਾ ਗਿਆ ਹੈ, ਜਿਸ ਵਿਚ ਇਕ ਗ੍ਰਾਮ ਪ੍ਰਧਾਨ ਦੀ ਹੱਤਿਆ, ਸਥਾਨਕ ਲੋਕਾਂ ਨੂੰ ਧਮਕਾਉਣਾ ਤੇ ਖੇਤਰ ’ਚ ਸ਼ਾਂਤੀ ਤੇ ਸਥਿਰਤਾ ਨੂੰ ਠੱਪ ਕਰਨ ਦੀ ਕੋਸ਼ਿਸ਼ ਸ਼ਾਮਲ ਹਨ। ਇਨ੍ਹਾਂ ਅੱਤਵਾਦੀਆਂ ਦਾ ਢੇਰ ਕੀਤਾ ਜਾਣਾ ਬੇਕਸੂਰ ਨਾਗਰਿਕਾਂ ਦੀ ਰੱਖਿਆ ਕਰਨ, ਸਾਰੇ ਖਤਰਿਆਂ ਨੂੰ ਘੱਟ ਕਰਨ ਤੇ ਸੂਬੇ ’ਚ ਸ਼ਾਂਤੀ ਤੇ ਸੁਰੱਖਿਆ ਯਕੀਨੀ ਬਣਾਉਣ ਦੀ ਭਾਰਤੀ ਫ਼ੌਜ ਤੇ ਅਸਾਮ ਰਾਈਫਲਸ ਦੀ ਵਚਨਬੱਧਤਾ ਨੂੰ ਦਰਸਾਉਂਦਾ ਹੈ। ਜ਼ਿਕਰਯੋਗ ਹੈ ਕਿ 25 ਅਕਤੂਬਰ ਤੋਂ ਇਕ ਨਵੰਬਰ ਦੌਰਾਨ ਫ਼ੌਜ ਤੇ ਅਸਾਮ ਰਾਈਫਲਸ ਨੇ ਮਨੀਪੁਰ ਪੁਲਿਸ ਦੇ ਨਾਲ ਤਾਲਮੇਲ ’ਚ ਮਨੀਪੁਰ ਦੇ ਥੌਬਲ, ਟੈਂਗਨੌਪਾਲ, ਖੁਗਾ, ਕੇਇਬੁਲ, ਤ੍ਰੋਂਗਲਾਓਬੀ ਮਾਖਾ ਲੇਈਕਾਈ, ਕੇਈਰਾਓ ਵਾਂਗਖੇਮ ਕਾਕਚਿੰਗ, ਬਿਸ਼ਨੂਪੁਰ, ਇੰਫਾਲ ਵੈਸਟ ਤੇ ਇੰਫਾਲ ਈਸਟ ਜ਼ਿਲ੍ਹਿਆਂ ’ਚ ਸਹੀ, ਖੁਫੀਆ ਜਾਣਕਾਰੀ ’ਤੇ ਆਧਾਰਤ ਸਾਂਝੇ ਅਭਿਆਨਾਂ ਨੂੰ ਅੰਜਾਮ ਦਿੱਤਾ।
