ਆਗਰਾ: 
ਮਗਰਮੱਛ ਦੇ ਜਬਾੜੇ ਵਿੱਚੋਂ ਆਪਣੇ ਪਿਤਾ ਦੀ ਜਾਨ ਬਚਾਉਣ ਵਾਲੇ ਅਜੈ ਰਾਜ ਦੇ ਸਾਹਸ ਨੂੰ ਸਲਾਮ ਹੈ। ਉਹ ਜਾਣਦਾ ਸੀ ਕਿ ਮਗਰਮੱਛ ਉਸ ਨਾਲੋਂ ਕਿਤੇ ਜ਼ਿਆਦਾ ਤਾਕਤਵਰ ਹੈ ਅਤੇ ਚੰਬਲ ਨਦੀ ਵਿੱਚ ਪਲਕ ਝਪਕਦੇ ਹੀ ਉਹ ਉਨ੍ਹਾਂ ਨੂੰ ਚਬਾ ਸਕਦਾ ਹੈ। ਪਰ ਉਸ ਨੇ ਸਾਹਸ ਦੇ ਨਾਲ-ਨਾਲ ਚਤੁਰਾਈ ਦਾ ਵੀ ਸਬੂਤ ਦਿੱਤਾ ਅਤੇ ਡਾਂਗ ਨਾਲ ਮਗਰਮੱਛ ਦੇ ਮੂੰਹ ਅਤੇ ਅੱਖਾਂ ‘ਤੇ ਲਗਾਤਾਰ ਹਮਲੇ ਕਰਕੇ ਆਪਣੇ ਪਿਤਾ ਨੂੰ ਮੌਤ ਦੇ ਮੂੰਹੋਂ ਕੱਢ ਲਿਆ।ਅਜੈ ਦੇ ਇਸ ਅਦੁੱਤੀ ਸਾਹਸ ਲਈ ਸ਼ੁੱਕਰਵਾਰ ਨੂੰ ਨਵੀਂ ਦਿੱਲੀ ਵਿਖੇ ਰਾਸ਼ਟਰਪਤੀ ਦ੍ਰੌਪਦੀ ਮੁਰਮੂ ਨੇ ਉਸ ਨੂੰ ‘ਪ੍ਰਧਾਨ ਮੰਤਰੀ ਰਾਸ਼ਟਰੀ ਬਾਲ ਪੁਰਸਕਾਰ-2025’ (ਸਾਹਸ ਸ਼੍ਰੇਣੀ) ਨਾਲ ਸਨਮਾਨਿਤ ਕੀਤਾ। ਇਸ ਪੁਰਸਕਾਰ ਵਿੱਚ ਇੱਕ ਮੈਡਲ, ਪ੍ਰਸ਼ੰਸਾ ਪੱਤਰ ਅਤੇ ਇੱਕ ਲੱਖ ਰੁਪਏ ਦੀ ਰਾਸ਼ੀ ਸ਼ਾਮਲ ਹੈ। ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਨੇ ਵੀ ਅਜੈ ਨੂੰ ਇਸ ਮਾਣਮੱਤੀ ਪ੍ਰਾਪਤੀ ‘ਤੇ ਵਧਾਈ ਦਿੱਤੀ ਹੈ।25 ਜੁਲਾਈ 2025 ਦੀ ਦੁਪਹਿਰ ਨੂੰ ਪਿੰਡ ਝਰਨਾਪੁਰਾ ਦਾ ਰਹਿਣ ਵਾਲਾ ਵੀਰਭਾਨ ਉਰਫ਼ ਬੰਟੂ ਚੰਬਲ ਨਦੀ ਦੇ ਕੰਢੇ ਬੱਕਰੀਆਂ ਚਰਾ ਰਿਹਾ ਸੀ। ਉਸ ਦੇ ਨਾਲ ਉਸ ਦਾ 10 ਸਾਲਾ ਪੁੱਤਰ ਅਜੈ ਰਾਜ ਵੀ ਸੀ। ਜਦੋਂ ਵੀਰਭਾਨ ਪਾਣੀ ਭਰਨ ਲਈ ਨਦੀ ਵਿੱਚ ਗਿਆ ਤਾਂ ਇੱਕ ਵਿਸ਼ਾਲ ਮਗਰਮੱਛ ਨੇ ਉਸ ਦੀ ਸੱਜੀ ਲੱਤ ਫੜ ਲਈ ਅਤੇ ਉਸ ਨੂੰ ਡੂੰਘੇ ਪਾਣੀ ਵੱਲ ਖਿੱਚਣ ਲੱਗਾ। ਪਿਤਾ ਦੀਆਂ ਚੀਕਾਂ ਸੁਣ ਕੇ ਅਜੈ ਰਾਜ ਡਾਂਗ ਲੈ ਕੇ ਨਦੀ ਵਿੱਚ ਕੁੱਦ ਪਿਆ। ਉਸ ਨੇ ਪਹਿਲਾਂ ਮਗਰਮੱਛ ਦੇ ਮੂੰਹ ‘ਤੇ 10 ਡਾਂਗਾਂ ਮਾਰੀਆਂ, ਪਰ ਜਦੋਂ ਪਕੜ ਢਿੱਲੀ ਨਾ ਹੋਈ ਤਾਂ ਉਸ ਨੇ ਚਤੁਰਾਈ ਦਿਖਾਉਂਦਿਆਂ ਮਗਰਮੱਛ ਦੀਆਂ ਦੋਵੇਂ ਅੱਖਾਂ ਨੂੰ ਨਿਸ਼ਾਨਾ ਬਣਾ ਕੇ 5 ਡਾਂਗਾਂ ਮਾਰੀਆਂ। ਅੱਖਾਂ ‘ਤੇ ਹੋਏ ਹਮਲੇ ਕਾਰਨ ਮਗਰਮੱਛ ਘਬਰਾ ਗਿਆ ਅਤੇ ਲੱਤ ਛੱਡ ਕੇ ਭੱਜ ਗਿਆ।
