ਨਵੀਂ ਦਿੱਲੀ : 
ਕਾਂਗਰਸ ਦੇ ਮੁਅੱਤਲ ਵਿਧਾਇਕ ਰਾਹੁਲ ਮਾਮਕੂਟਾਥਿਲ ਨੂੰ ਪੁਲਿਸ ਨੇ ਗ੍ਰਿਫ਼ਤਾਰ ਕਰ ਲਿਆ ਹੈ। ਉਨ੍ਹਾਂ ਦੇ ਖਿਲਾਫ ਜਿਨਸੀ ਸ਼ੋਸ਼ਣ ਦਾ ਤੀਜਾ ਮਾਮਲਾ ਸਾਹਮਣੇ ਆਇਆ ਹੈ। ਕੇਰਲ ਪੁਲਿਸ ਨੇ ਐਤਵਾਰ ਦੁਪਹਿਰ 12:30 ਵਜੇ ਰਾਹੁਲ ਨੂੰ ਪਲੱਕੜ ਸਥਿਤ ਕੇ.ਪੀ.ਐਮ ਰੀਜੈਂਸੀ ਹੋਟਲ ਤੋਂ ਫੜਿਆ ਹੈ। ਰਾਹੁਲ ਨੂੰ ਜਲਦੀ ਹੀ ਮੈਜਿਸਟ੍ਰੇਟ ਦੇ ਸਾਹਮਣੇ ਪੇਸ਼ ਕੀਤਾ ਜਾਵੇਗਾ। ਰਾਹੁਲ ਮਾਮਕੂਟਾਥਿਲ ‘ਤੇ ਪਹਿਲਾਂ ਹੀ ਜਿਨਸੀ ਸ਼ੋਸ਼ਣ ਦੇ ਦੋ ਮਾਮਲੇ ਚੱਲ ਰਹੇ ਹਨ। ਕੇਰਲ ਹਾਈ ਕੋਰਟ ਨੇ ਪਿਛਲੇ ਮਹੀਨੇ ਰਾਹੁਲ ਨੂੰ ਜ਼ਮਾਨਤ ਦਿੱਤੀ ਸੀ। ਪਰ, ਹੁਣ ਤੀਜਾ ਮਾਮਲਾ ਸਾਹਮਣੇ ਆਉਣ ਤੋਂ ਬਾਅਦ ਰਾਹੁਲ ਦੀਆਂ ਮੁਸ਼ਕਲਾਂ ਵਧ ਗਈਆਂ ਹਨ। ਰਾਹੁਲ ਖਿਲਾਫ ਸ਼ਿਕਾਇਤ ਦਰਜ ਕਰਵਾਉਣ ਵਾਲੀ ਮਹਿਲਾ ਪਥਾਨਮਥਿੱਟਾ ਦੀ ਰਹਿਣ ਵਾਲੀ ਹੈ, ਜੋ ਮੌਜੂਦਾ ਸਮੇਂ ਕੈਨੇਡਾ ‘ਚ ਕੰਮ ਕਰਦੀ ਹੈ। ਮਹਿਲਾ ਦਾ ਦੋਸ਼ ਹੈ ਕਿ ਰਾਹੁਲ ਨੇ ਨਾ ਸਿਰਫ਼ ਜ਼ਬਰਦਸਤੀ ਉਸ ਦਾ ਜਿਨਸੀ ਸ਼ੋਸ਼ਣ ਕੀਤਾ, ਸਗੋਂ ਗਰਭਪਾਤ ਕਰਵਾਉਣ ਲਈ ਵੀ ਦਬਾਅ ਪਾਇਆ। ਇੰਨਾ ਹੀ ਨਹੀਂ, ਰਾਹੁਲ ਨੇ ਮਹਿਲਾ ਤੋਂ ਪੈਸੇ ਹੜੱਪਣ ਦੀ ਵੀ ਕੋਸ਼ਿਸ਼ ਕੀਤੀ ਸੀ।ਮਹਿਲਾ ਦਾ ਕਹਿਣਾ ਹੈ ਕਿ ਰਾਹੁਲ ਵੱਲੋਂ ਜਿਨਸੀ ਸ਼ੋਸ਼ਣ ਕੀਤੇ ਜਾਣ ਤੋਂ ਬਾਅਦ ਉਹ ਗਰਭਵਤੀ ਹੋ ਗਈ ਸੀ। ਉਹ ਬੱਚੇ ਦਾ ਡੀਐਨਏ (DNA) ਟੈਸਟ ਕਰਵਾਉਣ ਦੀ ਤਿਆਰੀ ਕਰ ਰਹੀ ਸੀ। ਅਜਿਹੇ ਵਿਚ ਜਦੋਂ ਰਾਹੁਲ ਨੂੰ ਆਪਣਾ ਡੀਐਨਏ ਦੇਣ ਲਈ ਕਿਹਾ ਗਿਆ ਤਾਂ ਉਸ ਨੇ ਸਾਫ਼ ਇਨਕਾਰ ਕਰ ਦਿੱਤਾ। ਪੀੜਤਾ ਨੇ ਰਾਹੁਲ ਦੇ ਖਿਲਾਫ ਕਈ ਸਬੂਤ ਹੋਣ ਦਾ ਵੀ ਦਾਅਵਾ ਕੀਤਾ ਹੈ। ਮਹਿਲਾ ਅਨੁਸਾਰ, ਉਹ ਆਪਣੇ ਵਿਆਹ ਤੋਂ ਖੁਸ਼ ਨਹੀਂ ਸੀ। ਇਸੇ ਦੌਰਾਨ ਉਸ ਦੀ ਮੁਲਾਕਾਤ ਰਾਹੁਲ ਨਾਲ ਹੋਈ। ਰਾਹੁਲ ਨੇ ਮਹਿਲਾ ਨਾਲ ਜਿਨਸੀ ਸਬੰਧ ਬਣਾਏ ਤੇ ਫਿਰ ਉਸ ਨੂੰ ਵਿਆਹ ਤੋੜਨ ਲਈ ਮਜਬੂਰ ਕੀਤਾ। ਰਾਹੁਲ ਨੇ ਮਹਿਲਾ ਨਾਲ ਵਿਆਹ ਦਾ ਵਾਅਦਾ ਕੀਤਾ ਸੀ ਤੇ ਬੱਚਾ ਪੈਦਾ ਕਰਨ ਲਈ ਦਬਾਅ ਬਣਾਇਆ। ਰਾਹੁਲ ਨੇ ਮਹਿਲਾ ਨੂੰ ਝਾਂਸੇ ‘ਚ ਫਸਾਉਣ ਲਈ ਕਿਹਾ ਸੀ ਕਿ ਜੇਕਰ ਬੱਚਾ ਪੈਦਾ ਹੋ ਗਿਆ ਤਾਂ ਘਰ ਦੇ ਇਸ ਵਿਆਹ ਲਈ ਆਸਾਨੀ ਨਾਲ ਮੰਨ ਜਾਣਗੇ, ਪਰ ਬਾਅਦ ਵਿੱਚ ਰਾਹੁਲ ਆਪਣੇ ਵਾਅਦੇ ਤੋਂ ਮੁਕਰ ਗਿਆ। ਕਾਂਗਰਸ ਪਾਰਟੀ ਦੇ ਸਾਬਕਾ ਵਿਧਾਇਕ ਰਾਹੁਲ ਮਾਮਕੂਟਾਥਿਲ ‘ਤੇ ਜਬਰ ਜਨਾਹ ਸਮੇਤ ਜ਼ਬਰਦਸਤੀ ਗਰਭਪਾਤ ਕਰਵਾਉਣ ਦੇ ਦੋਸ਼ ਹਨ। ਮਾਮਲਾ ਸਾਹਮਣੇ ਆਉਣ ਤੋਂ ਬਾਅਦ ਕਾਂਗਰਸ ਨੇ ਉਨ੍ਹਾਂ ਨੂੰ ਮੁਅੱਤਲ ਕਰ ਦਿੱਤਾ ਸੀ। ਉਨ੍ਹਾਂ ਦੇ ਖਿਲਾਫ ਮਾਮਲਾ ਦਰਜ ਹੈ, ਜਿਸ ‘ਤੇ ਕੇਰਲ ਹਾਈ ਕੋਰਟ ਵਿੱਚ ਸੁਣਵਾਈ ਜਾਰੀ ਹੈ। ਇਸ ਤੋਂ ਪਹਿਲਾਂ ਬੈਂਗਲੁਰੂ ਦੀ ਰਹਿਣ ਵਾਲੀ ਇਕ ਮਹਿਲਾ ਨੇ ਰਾਹੁਲ ‘ਤੇ ਜਬਰ-ਜਨਾਹ ਦਾ ਇਕ ਹੋਰ ਮਾਮਲਾ ਦਰਜ ਕਰਵਾਇਆ ਹੈ। ਜਬਰ-ਜਨਾਹ ਤੇ ਜ਼ਬਰਦਸਤੀ ਗਰਭਪਾਤ ਦਾ ਮਾਮਲਾ ਸਾਹਮਣੇ ਆਉਣ ਤੋਂ ਬਾਅਦ ਤੋਂ ਹੀ ਰਾਹੁਲ ਫ਼ਰਾਰ ਚੱਲ ਰਹੇ ਸਨ।
