ਅਯੁੱਧਿਆ : 
ਨਵਯ, ਭਵਯ ਤੇ ਦਿਵਯ ਰਾਮ ਮੰਦਰ ਰਾਮਲਲਾ ਦਾ ਤੀਜਾ ਜਨਮ ਉਤਸਵ ਮਨਾਉਣ ਲਈ ਸ਼ਰਧਾਲੂਆਂ ’ਚ ਭਾਰੀ ਉਤਸ਼ਾਹ ਹੈ। ਇਸ ਉਤਸਵ ਦਾ ਹਿੱਸਾ ਬਣਨ ਲਈ ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ ਤੋਂ ਪੂਰਵਲੀ ਸ਼ਾਮ ਤੱਕ ਲਗਪਗ ਦੋ ਲੱਖ ਪੰਜ ਹਜ਼ਾਰ ਸ਼ਰਧਾਲੂ ਅਯੁੱਧਿਆ ਪੁੱਜ ਚੁੱਕੇ ਹਨ। ਸ਼ਰਧਾਲੂਆਂ ਦੀ ਭਾਰੀ ਗਿਣਤੀ ਦੇ ਮੱਦੇਨਜ਼ਰ ਸ਼੍ਰੀਰਾਮ ਜਨਮਭੂਮੀ ਤੀਰਥ ਖੇਤਰ ਟਰੱਸਟ ਨੇ ਦਰਸ਼ਨ ਕਰਨ ਦੇ ਸਮੇਂ ਵਿਚ ਲਗਪਗ ਤਿੰਨ ਘੰਟਿਆਂ ਦਾ ਵਾਧਾ ਕੀਤਾ ਹੈ। ਸ਼ਰਧਾਲੂਆਂ ਨੂੰ ਸਵੇਰੇ 5 ਵਜੇ ਤੋਂ ਹੀ ਦਾਖ਼ਲਾ ਮਿਲਣਾ ਸ਼ੁਰੂ ਹੋ ਜਾਵੇਗਾ ਅਤੇ ਰਾਤ 11 ਵਜੇ ਤੱਕ ਮੰਦਰ ਦੇ ਕਿਵਾੜ ਖੁੱਲ੍ਹੇ ਰਹਿਣਗੇ। ਦੁਪਹਿਰ 12 ਵਜੇ ਸੂਰਜ ਦੀ ਰਸ਼ਮੀਆਂ ਪੰਜ ਮਿੰਟਾਂ ਤੱਕ ਰਾਮਲਲਾ ਦੇ ਲਲਾਟ ਦਾ ਅਭਿਸ਼ੇਕ ਕਰਨਗੀਆਂ। ਰਾਮ ਮੰਦਰ ਵਿਚ ਜਨਮ ਉਤਸਵ ਚੇਤਰ ਸ਼ੁਕਲ ਨੌਮੀ ਤਿਥੀ ਨੂੰ ਸ਼ੁੱਕਰਵਾਰ ਸਵੇਰੇ 9 ਵਜੇ ਰਾਮਲਲਾ ਦੇ ਪੰਚਾਮ੍ਰਿਤ ਨਾਲ ਮਹਾ ਅਭਿਸ਼ੇਕ ਨਾਲ ਸ਼ੁਰੂ ਹੋਵੇਗਾ ਜੋ ਲਗਪਗ 11 ਵਜੇ ਤੱਕ ਚੱਲੇਗਾ। ਸਵੇਰੇ ਮੰਗਲਾ ਅਤੇ ਸ਼ਰਿੰਗਾਰ ਆਰਤੀ ਤੋਂ ਬਾਅਦ ਜਨਮ ਉਤਸਵ ਦੇ ਸਮਾਗਮ ਸ਼ੁਰੂ ਹੋਣਗੇ ਅਤੇ ਪੀਲਾ ਵਸਤਰ ਧਾਰਨ ਕਰਾ ਕੇ ਰਾਮਲਲਾ ਦਾ ਸ਼੍ਰਿੰਗਾਰ ਕੀਤਾ ਜਾਵੇਗਾ। ਟਰੱਸਟੀ ਡਾ. ਅਨਿਲ ਕੁਮਾਰ ਮਿਸਰ ਮੁਤਾਬਕ ਸਵੇਰੇ 10.30 ਵਜੇ ਤੋਂ ਦੁਪਹਿਰ 12 ਵਜੇ ਤੱਕ ਗਰਭ ਗ੍ਰਹਿ ’ਤੇ ਆਵਰਨ ਰਹੇਗਾ। ਸਵੇਰੇ 11:45 ਵਜੇ ਆਵਰਨ ਦੌਰਾਨ ਛੱਪਣ ਭੋਗ ਲੱਗੇਗਾ, ਉਸ ਤੋਂ ਬਾਅਦ ਦੁਪਹਿਰ 12 ਵਜੇ ਰਾਮਲਲਾ ਦਾ ਜਨਮ ਹੋਵੇਗਾ, ਫਿਰ ਪੂਜਾ-ਅਰਚਨਾ ਅਤੇ ਆਰਤੀ ਹੋਵੇਗੀ ਅਤੇ ਸੂਰਜ ਦੇਵ ਰਾਮਲਲਾ ਦੇ ਲਲਾਟ ’ਤੇ ਤਿਲਕ ਕਰਨਗੇ। ਜਨਮ ਉਤਸਵ ਦੇ ਸਾਰੇ ਸਮਾਗਮ ਦਾ ਟੈਲੀਵਿਜ਼ਨ ਸਣੇ ਵੱਖ-ਵੱਖ ਮਾਧਿਅਮਾਂ ’ਤੇ ਸਿੱਧਾ ਪ੍ਰਸਾਰਣ ਕੀਤਾ ਜਾਵੇਗਾ। ਜਨਮ ਉਤਸਵ ਨਾਲ ਜੁੜੀਆਂ ਸਮੂਹ ਤਿਆਰੀਆਂ ਪੂਰੀਆਂ ਕਰ ਲਈਆਂ ਗਈਆਂ ਹਨ। ਰੂਟ ਡਾਇਵਰਜ਼ਨ ਲਾਗੂ ਕਰ ਕੇ ਚਾਰ ਪਹੀਆ ਵਾਹਨਾਂ ਦਾ ਦਾਖ਼ਲਾ ਪੂਰੀ ਤਰ੍ਹਾਂ ਰੋਕ ਦਿੱਤਾ ਗਿਆ ਹੈ। ਦੂਰ-ਦੂਰ ਦੇ ਖੇਤਰਾਂ ਤੋਂ ਆਉਣ ਵਾਲੇ ਰਾਮ ਭਗਤਾਂ ਨੂੰ ਧੁੱਪ ਤੇ ਗਰਮੀ ਤੋਂ ਬਚਾਉਣ ਲਈ ਪੂਰੇ ਰਾਮਜਨਮਭੂਮੀ ਕੰਪਲੈਕਸ ਤੇ ਦਰਸ਼ਨ ਮਾਰਗ ’ਤੇ ਕਾਲੀਨ ਵਿਛਾਈ ਗਈ ਹੈ। ਨਾਲ ਹੀ ਰਾਮਪੱਥ, ਭਗਤੀਪੱਥ ਅਤੇ ਧਰਮਪੱਥ ’ਤੇ ਵੀ ਮੈਟਿੰਗ ਕਰਾਈ ਗਈ ਹੈ। ਮੁੱਖ ਪ੍ਰਵੇਸ਼ ਦੁਆਰ ਦੇ ਸਾਹਮਣੇ ਅਤੇ ਪੂਰੇ ਅੰਗਦ ਟੀਲਾ ਕੰਪਲੈਕਸ ਵਿਚ ਸ਼ਰਧਾਲੂਆਂ ਲਈ ਵੱਡੇ ਪੰਡਾਲ ਬਣਵਾਏ ਗਏ ਹਨ।
