ਲੁਧਿਆਣਾ ਵਿਖੇ ਸੰਵਿਧਾਨ ਨਿਰਮਾਤਾ ਬਾਬਾ ਸਾਹਿਬ ਡਾ. ਭੀਮ ਰਾਓ ਅੰਬੇਡਕਰ ਦੇ ਬੁੱਤ ਨਾਲ ਹੋਈ ਬੇਅਦਬੀ ਦੇ ਵਿਰੋਧ ਵਿੱਚ ਅੱਜ ਸ਼ੁੱਕਰਵਾਰ ਨੂੰ ਅੰਮ੍ਰਿਤਸਰ ਵਿਖੇ ਭਾਈਚਾਰੇ ਵੱਲੋਂ ਜ਼ੋਰਦਾਰ ਰੋਸ ਪ੍ਰਦਰਸ਼ਨ ਕੀਤਾ ਗਿਆ। ਗੁੱਸੇ ਵਿੱਚ ਆਏ ਲੋਕਾਂ ਨੇ ਸ਼ਹਿਰ ਦੀ ਮੁੱਖ ਧਮਣੀ ਮੰਨੇ ਜਾਂਦੇ ਇਤਿਹਾਸਕ ਭੰਡਾਰੀ ਪੁਲ ‘ਤੇ ਧਰਨਾ ਦੇ ਕੇ ਆਵਾਜਾਈ ਪੂਰੀ ਤਰ੍ਹਾਂ ਠੱਪ ਕਰ ਦਿੱਤੀ। ਧਰਨਾਕਾਰੀਆਂ ਨੇ ਸੜਕ ‘ਚ ਬੈਠ ਕੇ ਨਾਅਰੇਬਾਜ਼ੀ ਕੀਤੀ, ਹਾਲਾਂਕਿ ਇਸ ਦੌਰਾਨ ਐਂਬੂਲੈਂਸ ਵਰਗੀਆਂ ਐਮਰਜੈਂਸੀ ਸੇਵਾਵਾਂ ਲਈ ਰਸਤਾ ਖੁੱਲ੍ਹਾ ਰੱਖਿਆ ਗਿਆ।
ਅੰਮ੍ਰਿਤਸਰ ਬੰਦ ਦਾ ਸੱਦਾ ਲਿਆ ਵਾਪਸ
ਚੱਕਾ ਜਾਮ ਤੋਂ ਪਹਿਲਾਂ ਕੇਂਦਰੀ ਵਾਲਮੀਕਿ ਮੰਦਰ ਵਿਖੇ ਵੱਖ-ਵੱਖ ਸਮਾਜਿਕ ਤੇ ਧਾਰਮਿਕ ਜਥੇਬੰਦੀਆਂ ਦੀ ਹੰਗਾਮੀ ਬੈਠਕ ਹੋਈ। ਵਪਾਰੀ ਵਰਗ ਦੇ ਹੋਣ ਵਾਲੇ ਆਰਥਿਕ ਨੁਕਸਾਨ ਅਤੇ ਆਮ ਲੋਕਾਂ ਦੀਆਂ ਜ਼ਰੂਰਤਾਂ ਨੂੰ ਧਿਆਨ ਵਿੱਚ ਰੱਖਦਿਆਂ ਸ਼ਹਿਰ ਨੂੰ ਪੂਰਨ ਤੌਰ ‘ਤੇ ‘ਅੰਮ੍ਰਿਤਸਰ ਬੰਦ’ ਕਰਨ ਦਾ ਸੱਦਾ ਵਾਪਸ ਲੈ ਲਿਆ ਗਿਆ ਅਤੇ ਸਿਰਫ਼ ਸੰਕੇਤਕ ਤੌਰ ‘ਤੇ ਭੰਡਾਰੀ ਪੁਲ ‘ਤੇ ਧਰਨਾ ਦੇਣ ਦਾ ਫ਼ੈਸਲਾ ਕੀਤਾ ਗਿਆ।
ਟਰੈਫ਼ਿਕ ਪ੍ਰਭਾਵਿਤ: ਡਾਇਵਰਸ਼ਨ ਨਾਲ ਲੱਗੀਆਂ ਲੰਮੀਆਂ ਕਤਾਰਾਂ
ਭੰਡਾਰੀ ਪੁਲ ਪੁਰਾਣੇ (ਅੰਦਰੂਨੀ) ਸ਼ਹਿਰ ਅਤੇ ਨਵੇਂ ਸ਼ਹਿਰ ਨੂੰ ਜੋੜਨ ਵਾਲਾ ਮੁੱਖ ਰਸਤਾ ਹੈ। ਇਸ ਕੋਰੀਡੋਰ ਦੇ ਬੰਦ ਹੋਣ ਨਾਲ ਸ਼ਹਿਰ ਦਾ ਸਾਰਾ ਟਰੈਫ਼ਿਕ ਦੂਜੀਆਂ ਸੜਕਾਂ ਵੱਲ ਮੋੜਨਾ ਪਿਆ, ਜਿਸ ਨਾਲ ਹਾਲ ਗੇਟ, ਰਾਮਬਾਗ਼, ਰੇਲਵੇ ਸਟੇਸ਼ਨ ਰੋਡ, ਕ੍ਰਿਸਟਲ ਚੌਕ ਅਤੇ ਕੂਪਰ ਰੋਡ ‘ਤੇ ਵਾਹਨਾਂ ਦਾ ਭਾਰੀ ਦਬਾਅ ਵਧ ਗਿਆ ਅਤੇ ਵਾਹਨਾਂ ਦੀਆਂ ਲੰਮੀਆਂ ਕਤਾਰਾਂ ਲੱਗ ਗਈਆਂ।
-
ਬਦਲਵੇਂ ਰਸਤਿਆਂ ਦੀ ਵਰਤੋਂ ਦੀ ਅਪੀਲ: ਵਾਹਨ ਚਾਲਕਾਂ ਨੂੰ ਰੀਗੋ ਬ੍ਰਿਜ/ਲੋਹਗੜ੍ਹ ਚੌਕ, ਟੈਂਕ ਚੌਕ, ਖ਼ਾਲਸਾ ਕਾਲਜ ਸਾਹਮਣੇ ਬਣੇ ਨਵੇਂ ਪੁਲ ਅਤੇ ਹੋਰ ਲਿੰਕ ਸੜਕਾਂ ਰਾਹੀਂ ਜਾਣ ਦੀ ਸਲਾਹ ਦਿੱਤੀ ਗਈ ਹੈ।
ਪੁਲਿਸ ਪ੍ਰਸ਼ਾਸਨ ਵਿੱਚ ਦਿਖੀ ਖਿੱਚੋਤਾਣ
ਧਰਨੇ ਦੌਰਾਨ ਪੁਲਿਸ ਮੁਲਾਜ਼ਮਾਂ ਵਿਚਕਾਰ ਆਪਸੀ ਬਹਿਸਬਾਜ਼ੀ ਦਾ ਮਾਹੌਲ ਵੀ ਸਾਹਮਣੇ ਆਇਆ। ਮੌਕੇ ‘ਤੇ ਇੱਕ ਏ.ਐੱਸ.ਆਈ. ਨੇ ਦੱਸਿਆ ਕਿ ਬੈਰੀਕੇਡਿੰਗ ADCP ਦੇ ਹੁਕਮਾਂ ‘ਤੇ ਕੀਤੀ ਗਈ ਹੈ, ਜਦਕਿ PCR ਮੁਲਾਜ਼ਮ ਬੈਰੀਕੇਡ ਹਟਾ ਕੇ ਆਪਣੇ ਤਰੀਕੇ ਨਾਲ ਜਾਮ ਖੁੱਲ੍ਹਵਾਉਣ ਦੀ ਗੱਲ ਕਰਦੇ ਨਜ਼ਰ ਆਏ।
